OZAMIS CITY, Misamis Occidental (Eagle News) – Mga hindi lisensyadong armas ang pakay ng paghahalughog ng mga pulis sa bahay ni Ozamiz City Mayor Reynaldo Parojinog, ngunit nakasabat rin ang mga awtoridad ng nasa isang kilo ng shabu.
Ayon kay Chief Insp. Jovie Espenido, Hepe ng Ozamiz City Police, kalahating kilo ng iligal na droga ang narekober ng mga awtoridad sa mismong tahanan ng alkalde na nasawi sa naturang raid.
Natagpuan naman ang isa pang kalahating kilo ng iligal na droga at ilang drug paraphernalia sa bahay naman ni Vice Mayor Nove Princess Parojinog-Echavez.
Bukod sa mga ito, nakuha rin ng mga pulis ang isang bag na naglalaman ng bultu-bultong tig-500 piso at isang papel na pinaniniwalaang listahan ng mga transaksyon.
